Noson Blasu Gwin
21ain Ionawr 2017
Lleoliad: Canolfan Reolaeth, Bangor
Noson Caws a Gwin, Canolfan Rheoli, Bangor .
Profodd yr abwyd o noson o flasu caws yn hynod ddeniadol i griw o ddeintyddion - efallai fod y ffaith fod blasu gwin yn rhan o'r noson wedi bod yn rhan o'r atyniad hefyd?
Ta waeth cafwd noson hwyliog ac addysgiadol iawn, tybed a ddylem wedi gofyn am 3 awr o addysg ol raddedig (CPD)?
Beth a ddysgwyd?
Os am yfed gwin, sicrhau ei fod o ansawdd da.
Cofio yfed digon o ddwr yn ogystal a chynnyrch y grawnwin.
Sicrhau fod Justin ar gael efo'i "swigan lysh" (sef y prawf breathalyser).
Gwersi perthnasol a dilys iawn i fywyd fel deintydd bid siwr.
Diolch i Cartin a Tristan am y syniad a'r trefnu, mae cyfeillgarwch a chymdeithasu yn ran pwysig o aelodaeth o'r Gymdeithas.
Edrychwn ymlaen at y Noson Gwyl Dewi ac wrth gwrs holl weithgareddau Y Gymdeithas.
Cliciwch isod i weld lluniau'r digwyddiad hwn.
Cinio Gwyl Ddewi 2017
4ydd Mawrth 2017 19.30
Lleoliad: Nant yr Odyn, Llangristiolus
Cawsom Noson ddifyr yng ngwmni Mr Richard Neale o'r Ymddiriedolaeth
Genedlaethol. Bu'n egluro pam y sefydlwyd yr Ymddiriedolaeth ac yn rhestru
nifer o ardaloedd yng Ngymru sydd o dan ei rheolaeth. Bu'm yn
dysgu am engreifftiau cynnar o roi eiddo preifat i'r ymddiriedolaeth er mwyn
gwarchod harddwch naturiol tirwedd cymru rhag datblygiadau cyfoes. Un o'r rhain
oedd darn o lechwedd yn y Bermo a roddwyd i'r Ymddiriedolaeth gan Fanny Talbot
dros ganrif yn ol.
Erbyn hyn mae 157 milltir o arfordir cymru yn berchen i'r
Ymddiriedolaeth. Bu Richard yn adrodd hanes ei daith forwrol o amgylch arfordir
cymru yn 2016 gan deithio o Lanau Dyfrdwy i Fae Caerdydd, gan ymweld a'r holl safleoedd arfordirol at ei ffordd (yn ogystal a gweld ambell i ddolffin)!
Cliciwch isod i weld lluniau'r digwyddiad hwn.
Darlith y Gwanwyn 2017
5ed Ebrill 2017 I'w Gadarnhau
Lleoliad: Gwesty'r Imperial Llandudno
Cyfarfod gwyddonol y Gymdeithas, Ebrill 2017, Gwesty'r imperial, Llandudno.
"Hynt a helynt yn y drinfa dros ddeugain mlynedd a cwis i ddilyn."
Criw dethol a deallus tu hwnt gyfarfu i wrando ar y sgwrs hynod ddiddorol a draddodwyd gan Gareth Davies ar noson braf ond oer yn Llandudno.
Cawsom bryd blasus ac ymgom hwyliog cyn y ddarlith.
Clywsom am hanes gyrfa Gareth, o'r dyddiau cynnar yn Lerpwl a Manceinion drwy ei amser mewn practis yn Rhuddlan hyd at y presennol yn ddeintydd cymuned a thiwtor ol raddedig yn Wrecsam.
Bu Gareth yn onest a gwylaidd iawn yn adrodd mwy am y troeon trwstan nac am y llawer o lwyddiant a gafodd hyd yma yn ei yrfa. Cadarnhaodd ei sgwrs cymaint mae y byd wedi newid, yn y gorffenol cymharol ysgafn oedd y goruchwyliaeth, ond efallai mwy o hwyl i gael ar wneud y gwaith?
Dilynodd Gareth efo cwis i'n goleuo am yr arwyddion o gancr o fewn ac o gwmpas y geg.
Pwysleisiwyd y pwysigrwydd o fod yn gyson wyliadwrus am arwyddion buan o'r newidiadau canseraidd, a tynnu ein sylw fod y cyflyrau ar gynnydd.
Cyfuniad felly o'r llon a'r lleddf, ond yn noson ddifyr a gwerth chweil.
Diolch i Gareth am fod mor barod unwaith eto i gyfranu, ac i Elen a'r gwesty am y trefniadau.
Cliciwch isod i weld lluniau'r digwyddiad hwn.
Taith Gerdded y Gymdeithas Ddeintyddol
17eg Mehefin 2017
Lleoliad: Y Gogarth, Llandudno
Trefnwyd tywydd delfrydol ar gyfer y daith gerdded eleni!
Cyfarfu 11 ohonom ym maes parcio Ffordd Maelgwn, Llandudno, ac oddi yno ymlwybro i fyny’r Gogarth. Gwaith caled am yr awr gyntaf gan godi o lefel y môr i tua 200 medr ar y ‘Llwybr Igam Ogam’ troellog a serth.
Cafwyd seibiant haeddiannol ger y copa am banad/hufen iâ, etc. (a chyfle i diolch i William am ei haelioni). Yna cerdded o gwmpas y trwyn, heibio‘r Eglwys ac yna i lawr yn ôl i dref Llandudno a chyrraedd yn ôl wrth ochr y ganolfan sgïo.
Cawsom olygfeydd hyfryd trwy gydol y daith dair awr: Eryri, Ynys Môn ac Ynys Seiriol, Traeth Lafan, ac i lawr i gyfeiriad Llanduno a draw i tuag at Lerpwl.
Yn ein disgwyl yn y bwyty (ardderchog), ’Seahorse’, ar Rodfa'r Eglwys, 'roedd un neu ddau nad oedd ddim wedi cerdded ond da iawn oedd cael eu cwmni. Mwynhawyd gwledd hynod flasus, yn cynnwys digon o ddewis o fwyd o'r mor.
Bu’n ddiwrnod cofiadwy. Diolch i bawb am eu cwmni ac i'r plant am gerdded mor barod a bywiogi'r diwrnod.
Cliciwch isod i weld lluniau'r digwyddiad hwn.
Eisteddfod Genedlaethol Bodedern 2017
4ydd Awst i 4ydd Awst 2017
Lleoliad: Bodedern
Eisteddfod Genedlaethol Mon 2017.
Cafodd y Gymdeithas y cyfle i rannu safle gyda Betsi Cadwaladr ar Faes yr Eisteddfod eleni ar y dyddiau Llun a Mawrth.
Er y dilyw ar y nos Sul llwyddwyd gael popeth yn barod ben bore Llun yng nghwmni criw Cynllun Gwen. Ar ol dechra eithaf araf deg bu cryn brysurdeb, profodd holiadur a chwis Catrin yn llwyddiant ysgubol - tybed oedd y gwobrau o frwshus dannedd trydan yn abwyd?
Ni fu gwerthiant helaeth ar y Geiriadur ond llwyddais i werthu un i Carwyn Jones! Efallai mai ansawdd ddim nifer y prynwyr sydd yn cyfrif? 'Roedd hyn ar y dydd Llun, cyn y cyhoeddiad am arian newydd (?) i ddeintyddiaeth, ysywaeth wedi'i anelu at ond rhan o Gymru (sef y De wrth reswm).
Diolch i Catrin,Elen, Elsbeth a Stephen am ei cymorth parod ac am gyfrannu at lwyddiant ein ymddanghosiad.
Diolch hefyd i Elaine Topps, Nest Jones a Sarah Archer o Cynllun Gwen am gludo ein geriach i'r Maes ac am ei cwmni; Sandra Sandham, Sylvia Thomas a Sian Chelton o Adran Ddeintyddol yr Awdurdod Iechyd am y posteri, taflenni etc
Cliciwch isod i weld lluniau'r digwyddiad hwn.
Cynhadledd y Gymdeithas Ddeintyddol 2017
7fed Hydref 2017 09.00
Lleoliad: Gwesty'r Hilton, Lerpwl
Cynhadledd 2017
Gwesty'r Hilton, Lerpwl
Cyfarfu criw deallus a hwyliog yn Lerpwl i fwynhau chweched Cynhadledd ar hugain y Gymdeithas Ddeintyddol.
Gwaetha’r modd, roedd tipyn o gwmwl drosom eleni oherwydd y newydd trist a ddaeth i law ychydig dyddiau ynghynt am farwolaeth Meryl, gwraig Siôn Griffiths. Byddai Meryl yn gyson wrth ochr Siôn a chawsom y fraint a'r pleser o ddod i'w hadnabod yn ystod sawl Cynhadledd yn y gorffennol. Estynnwyd cydymdeimlad aelodau’r Gymdeithas i gyd â Siôn a'r teulu.
Croesawyd pawb gan Geraint Buse, Llywydd y bore. Y siaradwr cyntaf oedd y niwrolegydd Dr Rhys Davies a phrofodd i fod yn feistr ar ei bwnc ac yn siaradwr ardderchog. Ei destun oedd ‘Dementia’, a rhoddwyd esboniad clir a chroyw o'r cyflyrau perthnasol a’r dylanwad a geid ar waith y deintydd.
Cafwyd cyfle yn ystod amser panad i sgwrsio â chynrychiolwyr Denplan a Heraeus Kulzer, dau gwmni a noddodd y Gynhadledd yn hael iawn.
Y nesaf i siarad oedd Dr John Williams. Traddododd ddarlith ddifyr am hanes a phersonaliaethau a fu’n gysylltiedig â meddygaeth a deintyddiaeth yn Lerpwl dros y canrifoedd. Roedd yn dda clywed am arloeswyr blaenllaw o dras Gymreig a oedd, yn eu dydd, yn gewri rhyngwladol yn eu priod feysydd.
Yn ystod y Cyfarfod Blynyddol, etholwyd Quentin Jones yn Gadeirydd a Sioned Davie yn aelod newydd o'r pwyllgor. Diolchwyd i Justin ac Elen am eu gwaith ac i aelodau'r pwyllgor, gan gynnwys Gareth Rhun, Catrin Tomos a Lowri Angharad sydd yn crwydro am sbel. Cafwyd trafodaeth am bolisi’r Ysgol Ddeintyddol yng Nghaerdydd o ran dethol myfyrwyr. Penderfynwyd dilyn y mater ymhellach a gwahoddwyd yr aelodau i gysylltu ag Aelodau’r Cynulliad i fynegi ein pryder.
Wedi cinio blasus ac amser i atgyfnerthu, cymerodd Linda Tomos yr awenau fel Llywydd y prynhawn. Estynnodd groeso i'r Barnwr Nic Pari a chafwyd sgwrs ddiddorol a hwyliog ganddo am ei brofiadau ar y Fainc ac fel sylwebydd pêl-droed. Bu’r Gymdeithas yn ffodus dros y blynyddoedd o gael llawer o siaradwyr galluog i draddodi Darlith Goffa Arfon, ac mae’n braf cael dweud bod y safon wedi ei chynnal yn anrhyddeddus eto eleni.
Cafwyd dwy ddarlith dra gwahanol ond safonol iawn yn y gystadleuaeth am Dlws Bryn. Teimlwyd bod y ddau gystadleuydd yn deilwng ond dewiswyd Sioned Davie yn fuddugol o drwch blewyn. Diolch iddi hi a Huw Ifan am gadw’r gystadleuaeth yn fyw a chynnal safon uchel y gorffennol.
Cawsom Gynhadledd hapus a llwyddiannus ac yn awr cawn edrych ymlaen yn eiddgar i gyfarfod eto yn Abertawe y flwyddyn nesaf.
Cliciwch isod i weld lluniau'r digwyddiad hwn.